Një ndër kërkesat më të theksuara të studentëve ka qenë dhe pajisja me “Kartën e Studentit”. Shanset që kjo kërkesë t’i plotësohet së shpejti studentëve janë shumë të ulëta. Kryeministri Rama është shprehur se karta e studentit do të jetë gati nga fundi i vitit 2019.
Kjo kohë sipas liderit të PS-së duhet që të përcaktohen qartë se cilat produkte e shërbime do të përfshihen në kartën e Studentit. Për këtë, duhet që Ministria e Arsimit të lidhë marrëveshje me bashkitë dhe autoritetet e tjera për të lehtësuar xhepat e studentëve.
Rama ka ironizuar dhe studentët duke u shprehur se “nuk është karta që i ka penguar studentët të shkojnë në teatër e muze, të jemi serioz”.
“Po bëhet një draft për mënyrën e aplikimit dhe çështje të tjera teknike, në janar 2019 do miratojmë dy vendime, dhe fundi i 2019-ës është afati i realizimit”, u shpreh Rama.
Karta e studentit i jep mundësinë studentëve që të përdorin transportin publik falas, të kenë akses në kinema, muze e në mjedise të tjera me pagesë të reduktuar.
