Në Portin e Durrësit do të realizohet një ndër investimet më të mëdha, i cili do të transformojë totalisht pamjen aktuale të këtij porti duke i dhënë atij një pamje dinjitoze.
Kryeministri Edi Rama ka publikuar sot detaje nga projekti për portin e ri turistik të Durrësit, i cili me investimin prej 2 miliardë eurosh pas marrëveshjes së bashkëpunimit me Qeverinë e Emirateve të Bashkuara, do të kthehet në marinën më të madhe të Mesdheut.
“MIRËMËNGJES, dhe me këtë shembull të thjeshtë, të një investimi fantastik e të shumëpritur si ky, që na janë dashur disa vjet ta afrojmë kaq pranë, i cili tregon fare qartë edhe pse mandati i tretë nuk është për mua, po është për ju, për Durrësin, për të gjithë ne dhe për mbarë Shqipërinë, duke na dhënë mundësinë të mos lemë në mes asnjë nga betejat për të ardhmen, ju uroj një fundjavë të qetë”, shprehet Rama.
Ndërtimi i portit turistik të Durrësit do të hapë 12 mijë vende pune. Sipas masterplanit, porti i mallrave do të rialokohet në zonën e Porto Romanos, ndërkohë që porti aktual do t’i nënshtrohet një rehabilitimi të plotë, i cili do t’a kthejë atë në një port turistik.
Porti i ri i Durrësit do të lidhet me zonën e Porto Romanos, e klasifikuar si një zonë e lirë ekonomike, me një linjë hekurudhore e cila do të lehtësojë lëvizjen dhe qarkullimin e mallrave.
“Ne duhet të shohim perspektivën e portit të mallrave si një perspektivë të lidhur në një anë me ambicien për të pasur një port shumë të rëndësishëm nga pikëpamja e vëllimeve që administron, dhe për ta pasur portin të lidhur me një hapësirë të aktivitetit ekonomik që në zemrën e qytetit është e pamundur”, ka deklaruar pak ditë më parë Kryeministri Rama.
Rama është shprehur se “nëse sot kemi një nga kompanitë më të mëdha të botës, e cila ka ndërtuar dhe operon në një pjesë të madhe të investimeve turistike në gjithë Lindjen e Mesme, por jo vetëm, që jo vetëm e ka shprehur dëshirën, por tani më ka dorëzuar edhe projektin e fazës së parë të portit turistik të Durrësit, kjo vjen sepse Shqipëria ka ndryshuar në sytë e botës, kjo është pak, por e sigurt”.
