Kryeministri Edi Rama është pritur në një takim nga kancelarja Angela Merkel ditën e sotme në Gjermani në kuadër të lobimit për hapjen e negociatave. Kreu i qeverisë shqiptare ka dalë i kënaqur dhe optimist nga takimit me Merkel duke e vlerësuar si mike të vërtetë. Ai thotë se ka mbetur shumë i inkurajuar nga predispozita pozitive.
“‘Në Kancelarinë Federale për të kërkuar PO-në për Shqipërinë. Shumë i inkurajuar nga vlerësimet dhe predispozita pozitive ndaj Shqipërisë e kancelares Merkel. Mike e vërtetë” shkruan Rama, teksa ka shpërndarë në faqen e tij në rrjetet sociale pamjet e pritjes dhe përfundimit të takimit me kancelaren gjermane.
Takimet ditën e sotme në Gjermani nisën me një bashkëbisedim në Komitetin e Çështjeve Europiane të Bundestagut. Kryeministri e vlerësoi takimin si të hapur dhe pozitiv. “Në Komitetin e Çështjeve Europiane të Bundestagut për të kërkuar PO-në e parlamentit gjerman për Shqipërinë. Bashkëbisedim i hapur dhe pozitiv” shkruan Rama.
Ditën e sotme kryetari i komisionit të Bundestagut për Europën Günter Krichbaum deklaroi se është shumë optimist se vendimi për Maqedoninë Veriore në tetor për cështjen e negociatave do të jetë pozitiv, ndërsa për Shqipërinë u shpreh se ende nuk është marrë një vendim në Bundestag, pasi janë duke u këshilluar. E ndërsa sinjalet që vijnë nga Gjermania janë pozitive, të vetmet vende skeptike që ende nuk janë shprehur janë Franca dhe Holanda. Vendimi për Shqipërinë dhe Maqedoninë do të merret në mes të Tetorit.
