Isabel Santos, eurodeputetja dhe raportuesja për Shqipërinë në Parlamentin Europian deklaroi sot se vendimi për hapjen e negociatave me Shqipërinë është plotësisht i merituar. Ambasadori i Bashkimit Europian në Shqipëri, Luigi Soreca përcolli intervistën e eurodeputetes, duke theksuar deklaratën e saj se “Vendimi për hapjen e negociatave me Shqipërinë plotësisht i merituar”. “Ndërsa përqendrimi tani është në menaxhimin e krizës COVID-19, puna për reformat duhet të vazhdojë”, u shpreh Santos në intervistën e saj për “European Western Balkans”.
“Që nga vendimi për të hapur negociatat e pranimit, Shqipëria dhe pjesa tjetër e Europës janë marrë me urgjencën e pandemisë globale që lidhet me virusin COVID-19. Për më tepër, vendi ishte duke u rikuperuar nga tërmeti i tmerrshëm i nëntorit të kaluar. Sidoqoftë, unë besoj se ky vendim u mor në një mënyrë shumë pozitive nga autoritetet dhe se gjithashtu ndihmoi për të dhënë një motiv shtesë për të vazhduar me reformat që kanë vazhduar në Shqipëri”, shprehet ajo.
“Fatkeqësisht dhe për shkak të gjendjes aktuale të jashtëzakonshme nuk mund të jap një përgjigje konkrete në lidhje me afatet ose datat. Megjithëse e di që të dy palët po vazhdojnë bashkëpunimin dhe punën e tyre për të përmbushur ato kushte, lufta kundër pandemisë globale tani është në pararojë të mendjes së të gjithëve. BE vazhdon të jetë aktive në terren, duke ndihmuar në përpjekjet e rindërtimit pas tërmetit – 15 milionët e parë janë duke ndihmuar tashmë me rindërtimet e shkollave – gjithashtu, siç mund ta shohim nga lajmet më të fundit të donacioneve të kutive të testimit dhe aktivizimit të ndihma makro financiare, e cila do të ndajë 180 milion € për Shqipërinë. Ky bashkëpunim i Bashkimit Evropian me autoritetet dhe partnerët e tjerë do të ndihmojë vendin të ecë përpara gjatë këtyre kohërave të provuara”, ka thënë Isabel Santos, Raportuese për Shqipërinë në Parlamentin Europian.
