Presidenti Ilir Meta ka reaguar pas rritjes së numrit të rasteve të reja me COVID-19 në vendin tonë. Përmes një postimi në rrjetet sociale, Meta shkruan se tashmë pandemia në Shqipëri po del jashtë kontrollit. Presidenti thotë se kapacitetet spitalore për të pritur shtrimet e reja ditore janë të tejmbushura.
Meta thotë se qeveria “Rama” nuk ka asnjë plan për nisjen e vaksinimit masiv të popullsisë dhe se vijon të bëj propagandë. Ai i ka bërë thirrje qeverisë të marrë masa, ndërsa shton se nevojitet urgjentisht një strategji e re për të frenuar pandeminë. Presidenti e mbyll postimin e tij, duke iu bërë apel qytetarëve që respektojnë masat anti-COVID dhe të të mos e ulin vigjilencën.
“Pandemia COVID-19 në vendin tonë po del jashtë kontrollit. Në 24 orët e fundit, është regjistruar numri më i lartë i qytetarëve të infektuar, krahasuar me çdo ditë tjetër. Një tjetër shifër tronditëse është shënuar edhe sa i përket jetëve të humbura. Kapacitetet spitalore për të pritur shtrimet e reja ditore, rezultojnë të tejmbushura. Ndërkohë veç propagandës, asnjë plan nuk ka për nisjen e vaksinimit masiv të popullsisë.
Duke shprehur shqetësimin më madh për këta tregues të dhembshëm, i bëj thirrje Qeverisë të mos bëjë sehir dhe as mos t’i trajtojë qytetarët, si numra për statistika ditore, duke i lënë në mëshirë të fatit. Çdo shqiptar meriton të trajtohet me dinjitet dhe të ketë të gjithë asistencën e domosdoshme këshillimore dhe shëndetësore nga ana e shtetit, për të përballuar pasojat e rrezikshme të pandemisë. Është e patolerueshme të numërohen çdo ditë të infektuarit dhe jetët e humbura dhe të mos merret asnjë masë për të frenuar COVID-19.
Nevojitet urgjentisht, një strategji e re dhe efikase, për të frenuar pandeminë, përmirësuar kushtet në spitale, mbështetur financiarisht të prekurit dhe familjet e tyre dhe rritur nivelin ndërgjegjësues të popullatës. Çdo vonesë është kosto e madhe për qytetarët, shëndetin dhe jetën e tyre dhe kjo është jo vetëm e pafalshme, por edhe e dënueshme. Gjithashtu, ju bëj apel qytetarëve të mos e ulin vigjilencën dhe të vijojnë të zbatojnë me rigorozitet rregullat antiCOVID.”-shkruan Meta.
Prej disa ditësh Shqipëria ka regjiatruar numër të lartë të personave të infektuar me koronavirus, ndërsa sot u konfirmuan 15 viktima dhe 1089 raste të reja nga 4270 testime të kryera
