Deputetja Rudina Hajdari e ftuar në studion e lajmeve të Ora News, foli lidhur rreth takimit që do të mbajë të premten Këshilli Politik për Reformën Zgjedhore. Sipas saj, të premten do të jetë një ditë e madhe sepse do të diskutohet për ndryshimin e sistemit zgjedhor. Ajo u shpreh se ka disa propozime deri më tani për sistemin, ndërsa theksoi se të premten do të ketë dhe një propozim të ri nga deputetët demokratë në Kuvend, që të mbahet sistemi aktual por me korrektim kombëtar. Pra, nga sistemi proporcional rajonal në atë kombëtar dhe me lista të hapura.
Rudina Hajdari: Nesër do diskutojmë ndryshimet e sistemit. Është një ditë shumë e madhe për opozitën parlamentare që e ka zgjedhur këtë si një kalë beteje për misionin e saj brenda parlamentit. Ne kemi patur një propozim për ndryshimin e sistemit ku kemi mbledhur 38 firma, por dhe nga shoqëria civile kemi patur propozime. Është një numër i konsiderueshëm njerëzisht që duan ndryshimin e sistemit. Është një kauz që është e vërtetë. Ne do kemi dhe një propozim tjetër që vjen nga grupi parlamentar deputet, që propozojnë të njëjtin sistem por me korrektim kombëtar, pra proporcional rajonal por me korrektim kombëtar, duke patur dhe listat e hapura me 5 kandidatë. Kjo është një mundësi për të mos humbur votat partitë e vogla. Do ishte një zgjidhje e mirë nëse zgjidhet ky propozim.
Sipas Rudina Hajdarit, duhet që të gjitha palët të japin konsensus për këtë. Megjithatë, Hajdari la të kuptohet se pritshmëritë e saj për ndryshimin e sistemit nuk janë dhe aq të mëdha.
Rudina Hajdari: Ky është një konsensus i të gjitha palëve. Përqasja duhet të jetë e atillë që secili prej nesh të japë diçka dhe të marrë diçka nga ajo tryezë. Nuk mund të jetë një tryezë e njëanshme. Të gjithë duhet të bëjmë një kompromis në këtë tryezë. Unë do t`i rreshtoj të gjitha këto propozime nesër dhe si do reagojnë aktorët e tjerë politikë. Ndryshimi i sistemit është për ne një nga kauzat kryesore. Është një nga gjërat që ka ndryshuar cilësinë e parlamentit në Shqipëri. Ka një rënie të cilësisë në parlament që nga marrëveshja e 2008. Këto vitet e fundit ka mbytur demokracinë në vend. Çdo krizë është e lidhur me mënyrën se si dalin rezultatet e zgjedhjeve. Ne duam hapje të listave dhe ndryshim sistemi për të pasur një parlament më cilësor. Kosova pati zgjedhje për tu lakmuar, dhe tregon qartë se ata kanë një sistem më demokratik. Do të doja që kjo të ndodhte dhe në Shqipëri.
/Ora News.tv/
