Kryeministri Edi Rama tha sot në episodin e radhës të podkastit të tij “Flasim” se kaosi me rrugët nuk është shkaktuar nga korrupsioni, por nga natyra, ashtu sikurse po ndodh edhe në pjesën më të madhe të botës, pasi akset e vjetra kanë qenë të ndërtuara në formacione gjeologjike jo të forta në një pjesë, që me kalimin e viteve kanë pësuar edhe erozione nga kushtet atmosferike.
Ndërsa kaloi tek pika kryesore e ditës, që ka shkaktuar edhe shumë revoltë popullore, izolimi i juglindjes dhe shembja e rrugëve kombëtare, kryeministri shpjegoi se nuk është prekur Korridori Tetë siç thuhet në media dhe se po punohet në akset e dëmtuara për riparimet në kohë dhe kthimin e normalitetit.
Ngjarjen ai e cilësoi fatkeqësi natyrore.
Ai foli gjatë duke akuzuar opozitën me bombat artizanale dhe mediat, se po bëjnë zhurmë, pasi ishin rrëshqitje nga moti i keq si në të gjithë botën e rajonin e jo vepra të korrupsionit.
“Do të ndalem këtu te bombat artizanale që shpërthyen në 700 penxheret e Shqipërisë. Lidhet me një fatkeqësi, me ndërhyrjen e një force madhore, në aksin e Korridorit të tetë, aksin ku ndërtohet një nga veprat më kuptimplota të Shqipërisë, që pas rënies së regjimit. Kjo zhurmë, kjo çmenduri që çoi në veshin e shqiptarëve se ajo rrëshqitje prej 100 metrash në një aks qindra kilometra nuk ishte fatkeqësi, është një ardhje rrotull këmbësh rreth Shqipërisë në misionin e saj për të arritur në majën ku duan të shkojnë shqiptarët, në BE”, tha ai.
Më tej Rama këmbënguli se kjo zhurmë bëhej për të penguar vendin drejt integrimit, teksa u shpreh se rruga dhe misioni nuk do ndalet.
“Shqipëria po e lufton korrupsionin më shumë se asnjëherë. Po kaq e vërtetë është kjo sa lidhja e korrupsionit me rrëshqitjen, zero, zero. Aty ka diçka gjeologjike dhe asgjë që lidhet me kantierin dhe punimet që janë bërë në segmentin Elbasan-Qafë-Thanë, por në rrugën e vjetër ku materialet argjilore dhe formacionet janë efektuar si në shumë vende, përfshi e Greqinë fqinje, për shkak të reshjeve të pandërprera prej ditësh. ARRSH ka ndërhyrë menjëherë, Policia ka siguruar prani 24 orë, në të gjitha ditët, që kur ka ndodhu bllokimi. Puna intensive nuk është ndalur asnjë minutë, as puna për stabilizim të terrenit. Ekipet janë në terren për të shkuar përtej riparimit sipërfaqësor. Këto bëhen që të ndalin Shqipërinë drejt BE, por Shqipëria nuk ndalet”, tha ai.
