3 shtetas janë vënë në prangat e policisë në Tiranë. Ata janë punonjës në një firmë ndërtimi, e cila po ndërton një pallat në bulevardin “Gjergj Fishta”, ku punojnë edhe 3 shtetasit e arrestuar.
Ditën e djeshme, tek ky pallat ra një skelë e cila lëndoi 2 kalimtarë të rastit. Skela metalike dyshohet se ra për shkak të mosrespektimit të rregullave të sigurimit teknik në punë, për të cilën u shoqëruan fillimisht 3 punonjësit dhe më pas u vunë në pranga.
Sakaq, kalimtarët u dërguan në spital ku ndodhen jashtë rrezikut për jetën.
Njoftimi i Policisë:
Tiranë
Nuk respektuan rregullat e sigurimit teknik në punë dhe si pasojë, nga një pallat në ndërtim, ra një skelë që dëmtoi dy kalimtarë, vihen në pranga 3 shtetas, të punësuar në firmën që kryente punimet për ndërtimin e këtij pallati.
Specialistët për Hetimin e Krimeve të Komisariatit të Policisë Nr. 2, në vijim të veprimeve hetimore të kryera për ngjarjen e ndodhur ditën e djeshme, në bulevardin “Gjergj Fishta”, ku nga një pallat në ndërtim e sipër, ra një skelë që dëmtoi dy kalimtarë, arrestuan shtetasit:
E. O., 41 vjeç, E. K., 41 vjeç dhe Z. K., 49 vjeç, të tre banues në Tiranë, të punësuar respektivisht punëtor ndërtimi, sipërmarrës dhe inxhinier, në firmën që kryente punimet për ndërtimin e pallatit.
Ditën e djeshme, në orën 10:00, në bulevardin “Gjergj Fishta”, dyshohet se për shkak të mosrespektimit të rregullave të sigurimit teknik në punë, nga kati i 13-të i pallatit në ndërtim, ka rënë një skelë metalike që dëmtoi 2 kalimtarë të rastit, shtetasit I. Sh., 38 vjeçe dhe H. L., 72 vjeç, të cilët ndodhen jashtë rrezikut për jetën.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
