Sulmuesi shqiptar, Rey Manaj, është afër kalimit te skuadra “Barcelonës” në Spanjë. Futbollisti i kombëtares shqiptare ka tërhequr vëmendjen e katalanasve me paraqitjet e tij te “Albacete”
Lajmi bëhet me dije nga gazeta sportive katalanase “Sport”. Sipas shkrimit të publikuar prej saj, “Barcelona” ka arritur marrëveshjen për transferimin e Manaj, i cili do të jetë pjesë e Barcelonës B. 22-vjeçari ka shënuar dy gola në 9 takime këtë sezon dhe shihet si njeriu që do të sjellë gola te skuadra e dytë e klubit nga “Camp Nou”.
Lushnjari ka një kontratë me Albacete deri në vitin 2024, por Barcelona e tërheq së tepërmi dhe në ditët e ardhshme pritet të prezantohet te skuadra e re. Në rast se zyrtarizohet gjithçka, Manaj do të bëhej futbollisti i parë shqiptar që firmos “Barcelonën” dhe që do të ketë mundësi të stërvitet me fituesin e 6 “Topave të Artë” , Lionel Messi.
