Biznesmeni Rezart Taçi rezulton i pafajshëm në Palermo. Ndonëse i akuzuar për bashkëpunim me mafien dhe pastrim parash, sipas dy dokumenteve të prokurorisë së Palermos nuk rezulton se ka hetim për të. “Nuk ka regjistrime subjekt i komunikimit”, thuhet në dokumentin e prokurorisë.
Taçi rezulton i pafajshëm nga Prokuroria e Palermos si në përfundim të hetimeve paraprake të nëntorit të vitit 2021 ashtu edhe në përfundim të hetimeve të marsit 2022, lidhur me çështjen e transferimit të shumës prej 18 milionë eurosh nga llogaria personale e Francesco Zummo nga një banke zvicerane në llogarinë e tij personale në një bankë të nivelit të dytë në Shqipëri.
Gazeta italiane “La Repubblica” raportoi në dhjetor 2021 se Prokuroria italiane kishte rrëzuar akuzat e ngritura ndaj ekonomistit Fabio Petruzzela për bashkëpunim me mafien. Në artikull thuhet se gjykatësi italian, Alfredo Montaldo, i ngarkuar me hetimin e çështjes, është shprehur se ekonomisti Petruzzella do të hetohet vetëm për akuzën e pastrimit të parave, pasi ka qenë pikërisht ai që ka kërkuar dhe kryer transferimin e rreth 18 milionë eurove.
Por, edhe kjo akuzë është kundërshtuar nga ekonomisti, i cili ka deklaruar se paratë kanë qenë të lira në Zvicër para dhe pas transfertës, dhe për këtë sipas tij, i lindte e drejta të vepronte në çdo formë dhe në çdo kohë me ato para. Media italiane raportoi se me rënien e akuzës kryesore për Petruzzellën, bie automatikisht edhe akuza e vetme që rëndonte mbi shqiptarin Rezart Taçi, pra ajo e bashkëpunimit me mafien.
Për këtë të fundit, prokurori Montaldo është shprehur se nuk ka prova që vërtetojnë korruptimin e ndonjë funksionari. Emri i Rezart Taçit u lakua gjatë hetimeve të Prokurorisë italiane për ekonomistin Fabio Petruzzella bashkë me sipërmarrësin 90-vjeçar Francesco Zummo.BW
