Partia Demokratike akuzon ministrin e Mjedisit, Blendi Klosi, dhe bashkinë e Tiranës se kanë rilicensuar kompaninë ‘Alb Tech Plast’, për të vijuar punën me riciklimin e mbetjeve.
Ina Zhupa, zëdhënëse e Partisë Demokratike, denoncon se Klosi përmes Agjencisë së Mjedisit, ka rilicensuar kompaninë e Edurim Teqjas, i cili ka ndryshuar emrin nga “3R”, në ‘Alb Tech Plast’. PD akuzon qeverinë se sa më shumë të abuzosh aq më shumë shpërblen abuzuesit.
Deklarata e plotë e Ina Zhupës:
Lincesohet përsëri nga qeveria Rama, kompania që menaxhonte landfillin e Sharrës me bekimin e Veliaj dhe ku u vra Ardit Gjoklaj dhe skllavëroheshin punëtorët e kompanisë !
Ne muajin Prill 2019 , Ministria e Mjedisit dhe Turizmit e drejtuar nga Blendi Klosi , nëpërmjet Agjencisë Kombëtare të Mjedisit kanë licensuar kompaninë Alb Tech Plast sh.p.k me pronar z. Edurim Teqja për të vazhduar në Elbasan ushtrimin e aktivitetit në fushën e mbetjeve plastike dhe llojeve të tyre.
“Alb Tech Plast sh.p.k” është kompania “3R sh.p.k” e cila ka kryer ndryshim emri me 17 Maj 2018 dhe zotërohet nga z. Edurim Teqja, në vitin 2016 kjo kompani u kontraktua nga Veliaj, Bashkia Tiranë për kryer diferencimin e mbetjeve në Landfillin e Sharrës jashtë çdo kushti dhe parametri teknik.
Në investigimet e medias doli qartë që në Landfill shfrytëzoheshin shumë persona, burra , gra dhe fëmijë jashtë kushteve të sigurisë në punë , pa sigurime shoqërore. Po ashtu ngjarja më e rëndë ndodhi 7 Gusht 2016 Ardit Gjoklaj u vra në ambientet e Landfillit nga ekskavatori i kompanisë 3R sh.p.k.
Shteti jo vetëm që nuk ndërmori masa për shkeljet e evidentuara por sot e ka lincensuar përsëri në të njëjtën fushë veprimtarie.
Sa më shumë të abuzosh, të vrasësh, të skllavërosh njerëzit aq më të lehtë e ke të bësh biznes me rilindjen. Ky është modeli i biznesit që promovojnë, ndërsa biznesi i ndershëm po mbyllet çdo ditë.
