Këshilli i Ministrave miratoi sot disa ndryshime në vendimin “Për përdorimin e fondit të rindërtimit, miratuar në buxhetin e vitit 2020, për financimin e rindërtimit të banesave individuale”. Sipas këtij vendimi parashikohet përdorimi i fondit të rindërtimit, miratuar në buxhetin e vitit 2020, në masën 7 280 349 288 lekë pa TVSH, për financimin e rindërtimit të banesave individuale, sipas projekteve model të miratuara.

Fondi i përcaktuar u kalon njësive zbatuese, dhe konkretisht 5 440 470 210 lekë pa TVSH i kalojnë Fondit Shqiptar të Zhvillimit, në buxhetin e miratuar për vitin 2020, në zërin “Shpenzime kapitale me financim të brendshëm” për “Programe zhvillimi”. Po ashtu, bashkisë Tiranë i transferohet fondi në masën 1 839 879 078 lekë pa TVSH, në formën e transfertës së pakushtëzuar. Për zbatimin e këtij vendimi ngarkohen ministri i Shtetit për Rindërtimin, Ministria e Financave dhe Ekonomisë, Fondi Shqiptar i Zhvillimit dhe Bashkia Tiranë.