Vodafone shënon një tjetër arritje të rëndësishme në industrinë e komunikimeve elektronike në Shqipëri, duke prezantuar për herë të parë në vend eksperiencën e rrjetit Gigabit, rrjeti më i shpejtë i përjetuar deri më sot në tregun tonë. Ministri i Infrastrukturës dhe Energjetikës, Damian Gjiknuri u ftua të ishte i pari për të provuar këtë eksperiencë të re, duke realizuar në kohë reale një udhëtim virtual në rrugën e Arbrit. Direkt nga zyrat e Vodafone, pa nevojën për të udhëtuar drejt kantierit të ngritur në zonën e Klosit, Ministri Gjiknuri monitoroi në kohë reale ecurinë e punimeve, nëpërmjet një lidhjeje direkte nga kamera e dronit në syzet Virtuale.
Damian Gjiknuri, Ministër i Infrastrukturës dhe Energjisë: Ky është një hap përpara për industrinë. Kjo përvojë mund të dëshmojë që koncesionet e rrugëve po punojnë. Ne si qeveri jemi plotësisht të gatshëm për të bashkëpunuar dhe për ta sjellë Shqipërinë në rrugën e re të rrjetit 5G, duke bërë që të gjitha përfitimet e biznesit dhe të individit të kenë qasje në risitë teknologjike.
Drejtori i Përgjithshëm i Vodafone Albania, e Achilleas Kanaris, e cilësoi GIGABIT një revolucion të ri industrial.
Achilleas Kanaris, Drejtori i Përgjithshëm i Vodafone Albania: Vodafone po krijon shoqërinë e Gigabit në të gjitha tregjet ku operon, dhe Shqipëria është në të njëjtën udhë të investimeve dhe zhvillimit teknologjik me tregjet e tjera të mëdha evropiane si Gjermania, Italia, Spanja etj. Rrjeti Gigabit, do të revolucionarizojë tregun, përvojën e biznesit dhe klientit. Ne e quajmë këtë revolucionin e ri industrial, ku fuqizimi ekonomik nëpërmjet risive teknologjike do të ndryshojë përgjithmonë mënyrën se si jetojmë.
Transmetimi live i videos në cilësinë maksimale 4K mundësohet nga kapaciteti i rrjetit Vodafone Gigabit, i aftë për të transmetuar të dhëna në milisekonda, pa vonesa pavarësisht distancave të largëta. Kjo do të mundësoi automatizimin e shume shërbimeve.
