Roma nuk ia ka dalë të vazhdojë serinë e fitoreve në kampionat, teksa është ndalur në një barazim 1-1 në fushën e Udinezes. Skuadra e Zhoze Murinjos, ku mungonte Kumbulla i skualifikuar, në fakt ka qenë me fat pasi ka siguruar të paktën një pikë në fundin e sfidës.
Molina i dha avantazhin vendasve që në minutën e 15 dhe i la kontrollin e lojës verdhekuqve. Por ata nuk arrtën të shfrytëzonin rastet e krijuara dhe të kthenin ndeshjen në favorin e tyre. Megjithatë, në minutat shtesë të ndeshjes ata ishin me fat pasi fituan një penallti të kontestuar gjatë nga vendasit, të cilën e transformoi me saktësi Pelegrini, për të vulosur barazimin 1-1.
Kështu, Roma ngjitet në kuotën e 48 pikëve, po aq sa Atalanta e cila ka përjetuar ndalesën e radhës në kampionat, duke barazuar këtë radhë me Xhenoan me shifrat 0-0. Kështu, për të dy skuadrat bëhet shumë më e vështirë sigurimi i një vendi në katërshen e parë, pasi tashmë ndjekin Juventusin me 8 pikë diferencë.
