TIRANË, 26 nëntor /ATSH/ – Autoriteti Rrugor Shqiptar informoi publikun se aksi Levan-Tepelenë, nuk është i kalueshëm në një segment të tij, për shkak të rrëshqitjes së gurëve në rrugë.
Autoriteti Rrugor Shqiptar dhe kompanitë kontraktore po vazhdojnë ndërhyrjen në terren për eliminimin e rrëshqitjes, në afërsi të Poçemit.
Autoriteti Rrugor Shqiptar, njofton se po punohet me intensitet të lartë për përfundimin e bypass-it në një kohë sa më të shkurtër, në mënyrë që të mundësojë rikthimin e qarkullimit normal të automjeteve.
Zona vijohet të mbahet nën monitorim për të shmangur rrezikshmërinë, duke qenë se vatra e rrëshqitjes është ende aktive.
Aktualisht kalimi i mjeteve kryhet përmes rrugës së vjetër të Ballshit, ndërsa Autoriteti Rrugor Shqiptar bën me dije se do t’i informojë qytetarët në momentin që do të jetë i aksesueshëm bypass-i për ta rikthyer lëvizjen në rrugën Levan-Tepelenës.
