Të paktën gjashtë persona janë vrarë dhe dy persona janë zhdukur pasi reshje të dendura shiu goditën bregdetin verilindor të Turqisë, duke shkaktuar përmbytje dhe rrëshqitje të dheut, tha të enjten ministri i Shëndetësisë. Reshjet e mëdha të shiut goditën provincën e Rizes, duke larguar makina dhe duke shkaktuar shembjen mureve të shtëpive. Pamjet video nga rajoni treguan gjithashtu rrëshqitje dheu që shkatërruan plantacionet e çajit.
Një grua 75 vjeçare u gjet e vdekur mes mbeturinave të shtëpisë së saj trekatëshe në rrethin Muradiye të Rizës, njoftoi Anadolu Agency. Shpëtuesit gjetën gjithashtu trupat e tre personave që vdiqën pasi rrëshqitjet e dheut shkatërruan pjesërisht një shtëpi prej druri. Mes viktimave ishte dhe krye-administratori i fshatit Asmaliirmak, i cili vdiq pasi u përpoq të shpëtonte persona të tjerë.
Ekipet e shpëtimit të dërguara në rajon po kërkonin për dy persona që mbeten të pagjetur, tha Ministri i Shëndetësisë Fahrettin Koca, duke shtuar se një person tjetër u shtrua në spital. Agjencia private e lajmeve DHA tha se qentë dhe zhytësit po ndihmonin misionin e kërkim-shpëtimit. Reshjet e mëdha të shiut mbyllën gjithashtu hyrjen në dhjetëra fshatra dhe ndërprenë furnizimet me energji elektrike. Më shumë se njëqind njerëz u evakuuan nga shtëpitë e tyre. Rajoni i Detit të Zi të Turqisë shpesh goditet nga shira të rrëmbyeshëm dhe përmbytje të shpejta.