Moderatori i emisionit investigativ ‘Stop’ në ‘Klan’, Saimir Kodra, ka zbuluar për publikun  se ai ka kaluar koronavirusin që në muajin janar të këtij viti. “Për t’ju zbuluar një sekret, në analizat që bëra të anti-korpeve, jam një person që e kam kaluar COVID-in. Pra e gjithë kjo situatë karantine që rrimë mbyllur, është për të respektuar të gjithën. Që në janar e kam kaluar”, u shpreh Kodra gjatë emisionit që drejton bashkë me moderatorin Gentian Zenelaj.

Vlen të theksohet fakti se Silva Bino, e cila është përgjegjëse e Departamentit të Epidemiologjisë në ISHP ka zbuluar më herët se shenjat e këtij virusi kishin nisur që në 28 shkurt. Ndonëse rasti i parë me koronavirus në Shqipëri u konfirmua zyrtarisht në datën 9 mars, shenjat e para nga studimi epidemiologjik kishin filluar në 28 shkurt.

Në lidhje me zërat se COVID-19 në Shqipëri është shfaqur më herët, Bino u shpreh në emisionin “360 Gradë” se kjo nuk ishte e mundur, pasi në spitale do kishin pasur grumbullime dhe shtim të vdekjeve.