Menjëherë pas bërjes publike të dorëheqjes së Fatmir Xhafajt, ish-ministri i Brendshëm Saimir Tahiri ka anulluar konferencën e shtypit që kishte paralajmëruar paraditen e sotme.
Nuk dihet nëse Tahiri kishte vendosur të bënte publike fakte për pasardhësin e tij në krye të ministrisë po duket se dorëheqja dhe anullimi i konferencës kanë lidhje të fortë mes tyre.
Xhafaj dhe Tahiri në asnjë moment nuk i kanë fshehur përplasjet mes tyre, ndërsa aludohet se Tahiri ka një dosje me të gjitha shkeljet e qeveritarëve të Ramës. Xhafaj ka akuzuar Tahirin për kanabizimin e vendit, edhe gjatë kohës kur ky i fundit ka qenë ende në detyrë.
Lajmin e dorëheqjes së Xhafajt e ka dhënë pak minuta më parë vetë kryeministri Edi Rama, ndërsa vendin e tij e ka zënë Sandër Lleshi. Xhafaj zëvendësoi Tahirin marsin e 2017-tës, pas protestave të vazhdueshme të PD-së dhe vendosjes së çadrës për tre muaj përpara kryeministrisë.
Xhafaj ka qenë një nga ministrat më të sulmuar të qeverisë Rama për shkak të dënimit të vëllait të tij për çështje droge në Itali.
