Gjykata e Posaçme e Apelit ka vendosur të shpallë te enjten vendimin për ish-kryeministrin Sali Berisha, i cili përmes avokatëve të tij ka ankimuar masën e sigurisë ‘arrest në shtëpi’.
Seanca e radhës do të mbahet në orën 09.00.
Kujtojmë se një ditë më parë, ish kryeministri Sali Berisha u paraqit në Prokurorinë e Posaçme për t’u marrë në pyetje për çështjen e privatizimit të ish Klubit sportiv Partizani .
Kjo ishte hera e parë që ai paraqitej te prokurorët e çështjes që kur në tetor të vitit të kaluar u mor nën hetim.
Ndaj Berisha nuk është ngritur akuzë. Ai dyshohet se ka favorizuar dhëndrin e tij Jamarbër Malltezi, një ndër pronarët e truallit ku shtrihej kompleksi sportiv, mbi të cilin u ndërtuan një grup pallatesh.
Duke shfrytëzuar pozitën e tij si kryeministër, sipas hetimit, ai dyshohet të ketë miratuar ligje dhe akte nënligjore duke i përshtatur sipas nevojave të ish pronarëve, dhe se përmes kontrolleve administrative është ushtruar presion ndaj strukturave shtetërore që të përshpejtonin procedurat si dhe vënien e këtyre strukturave në dispozicion të Malltezi për realizimin e privatizimit.
