Policia kufitare në Morinë ka sekuestruar 61 900 euro të padeklaruara, si dhe ka proceduar penalisht një 32 vjeçar.

Gjatë kontrollit të mjetit tip “Volksëagen, policia ka zbuluar shumën e parave që i përkisnin pasagjerit, shtetasit  Q. L., 32 vjeç, banues në Itali, ndaj të cili ka nisur procedimi për veprën penale: “Mosdeklarimi në kufi i të hollave dhe i sendeve me vlerë”.

Njoftimi i Policisë:

Morinë, Kukës/Policia Kufitare, kontrolle intensive për goditjen e veprimtarive kriminale.

Si rezultat i kontrolleve, goditet një tjetër rast i mosdeklarimit të të hollave në kufi.

Sekuestrohen 61 900 euro, procedohet penalisht 32-vjeçari që nuk i deklaroi në PKK Morinë.

Shërbimet e Policisë Kufitare në Morinë, në vijim të punës për goditjen e paligjshmërive në kufi, bazuar në analizën e riskut dhe në kontrollet me përzgjedhje, në hyrje të RSH-së, kanë kaluar në vijën e dytë, për kontroll më të imtësishëm, automjetin tip “Volksëagen”.

Gjatë kontrollit fizik ndaj pasagjerit të këtij automjeti, shtetasit Q. L., shërbimet e Policisë gjetën dhe sekuestruan 61 900 euro, të cilat ai nuk i kishte deklaruar, sipas përcaktimeve ligjore në fuqi.

Në përfundim të veprimeve hetimore, specialistët e Seksionit për Hetimin e Krimeve Ekonomike e Financiare të DVP Kukës referuan materialet në Prokurori dhe nisi procedimi në gjendje të lirë për shtetasin Q. L., 32 vjeç, banues në Itali, për veprën penale “Mosdeklarimi në kufi i të hollave dhe i sendeve me vlerë”.

Materialet iu referuan Prokurorisë pranë Gjykatës së Rrethit Gjyqësor Kukës, për veprime të mëtejshme.