Barcelona do të presë në “Camp Nou” Juventusin, të martën e 8 Dhjetorit një ndër sfidave të forta në grupet e Champions League. Në këtë sfidë do të përballen dy rivalët e përjetshëm përgjatë dekadës së fundit, Messi dhe Ronaldo, të cilët garojnë edhe për rekorde personale në këto kompeticione. Lidhur me super sfidën e nesërme lojtari i Barcelonës, Philippe Coutinho, ka thumbuar ekipin e “Zonjës së Vjetër”, ku kërkon fitore ndaj italianëve, që do të ishte kështu edhe e gjashta radhazi në fazën e grupeve. Në prononcimin e dhënë para takimit, 28-vjeçari karikon shokët e skuadrës në lidhje me duelin ndaj kampionëve të Italisë.
“Dueli ndaj Juventusit është nga ato takime që i luajmë me kënaqësi. Duam ta mbyllim grupin në vend të parë dhe ka shumë rëndësi të kthehemi te fitorja pas humbjes së shpifur që pësuam në kampionat. Mezi po presim të rikthehemi në fushë dhe të shfaqim forcën tonë të vërtetë. Humbja me Cadiz na ka lënë një shije të hidhur, por jemi gati të ndryshojmë gjërat për mirë. Unë ndihem mirë, ndihem më i fortë dhe e shoh shumë mirë skuadrën. E përsëris edhe njëherë, duam të ndryshojmë situatën e krijuar. Kjo Barcelonë është në fazë rindërtimi. Ka ardhur trajneri i ri, lojtarët kryesorë janë akoma pjesë e jona, na duhet vetëm pak kohë dhe durim, asgjë tjetër“, – theksoi braziliani i ekipit katalanas.
