Shkencëtarët janë duke tentuar ta kuptojnë mekanizmin, se si një lloj i peshkut arrin ta riparojë zemrën, që ta përdorin më pas për krijimin e trajtimit për pacientët me probleme të zemrës, shkruan Dailymail. Zebrafish- një lloj peshku meksikan, është bërë target i studimeve të shumta shkencore, për shkak të aftësisë së tyre për t’i riparuar dëmtimet në zemër.
Shkencëtarët nga Universiteti i Oxfordit ishin të surprizuar kur vërejtën, që disa qeliza të sistemit imunitar të peshqve të quajtura- makrofagë ishin agjentët kryesorë në këtë proces. Për herë të parë ata ishin në gjendje të shohin se si këta makrofagë prodhojnë një proteinë të quajtur kolagjen, e cila ndikon direkt në rigjenerimin e qelizave të zemrës. “Ky zbulim mund të jetë si shteg i gjetjes së një trajtimi efikas për njerëzit, që kanë pësuar sulm në zemër”, tha autori i këtij studimi.
Njerëzit, të cilët kanë pësuar dëmtime si rezultat i sulmit në zemër, zakonisht detyrohen t’i nënshtrohen transplantit të zemrës. Për të shmangur këtë procedurë, shkencëtarët janë duke u munduar të gjejnë një trajtim të duhur për t’ia mundësuar organizmit rigjenerimin e këtyre qelizave të dëmtuara, pa pasur nevojë për ndërhyrje kirurgjikale. Shkencëtarët nga Harvardi, me anë të një eksperimenti në minj, kanë vërejtur se pas transplantimin të kolagjenit të këtij lloj peshku në minj, disa pjesë të dëmtuara të zemrës tek ta ishin riparuar pas tre javëve.
“Ne jemi shumë të bindur që së shpejti do të arrijmë ta krijojmë një trajtim efikas, për të shmangur procedurat e transplantimit të zemrës tek pacientët me këto lloje të problemeve”, tha Dr. Filip Simons. Ky zbulim është publikuar në revistën shkencore “Nature Communacations”.
