Kjo javë solli edhe reshjet e para të dëborës në disa zona të vendit, një situatë që sipas sinoptikanëve do të vijojë edhe gjatë fundjavës. Sa i përket javës që vjen, situata atmosferike do të jetë e paqëndrueshme, ndërsa nuk do të mungojnë edhe reshjet e shiut

“I gjithë territori do jetë me vranësira, më të fokusuara do të jenë të shtunën në Verilindje dhe Juglindje duke gjeneruar dhe reshje dëbore. Parashikohet që edhe java tjetër të nisë me kushte të paqëndrueshme atmosferike. Do të kemi vranësira dhe shira, si dhe reshje dëbore kryesisht në zonat Verilindore dhe Juglindore”, thotë sinoptikanja Lajda Porja.

Sipas saj, dita më problematike ku shirat do të jenë më të dendur, parashikohet dita e martë. Por surprizat e motit nuk mbarojnë me kaq, pasi temperaturat e ulëta të këtyre ditëve duket se nuk do të qëndrojnë për shumë. Porja thotë se mesi i javës që vjen, sjell rritje të temperaturave.

“E gjithë pjesa që mbetet e muajit nëntor do jetë në kushte të paqëndrueshme atmosferike që nga mesi i javës deri në fund të Nëntorit do të kemi ndryshim të situatës termike pasi presim që të kemi rritje të temperaturave”.