Policia Financiare Italiane, në mbyllje të vitit 2019, ka publikuar të dhënat zyrtare mbi pasuritë e konfiskuar të mafias italiane gjatë 5 viteve të fundit. Plot 18 miliardë euro pasuri i janë sekuestruar krimit të organizuar vendas nga vitit 2015 e deri më sot. Sipas autoriteteve italiane janë 11 miliardë në para cash dhe 7 miliardë euro pasuri e patundshme. Kjo pasuri e marrë në dorëzim nga shteti është baras me 1 % të PPB kombëtare. Gjatë këtyre 5 viteve janë hetuar pasuritë e rreth 55 mijë personave e janë marrë në ekzaminim mbi 10 mijë produkte të tyre, mesatarisht 5.5 në ditë. Krimi i organizuar në Itali ka perfeksionuar jo vetëm aftësinë sipërmarrëse e ekonomike por dhe ka marrë një veshje më të sofistikuar ekonomiko-financiare.
Guardia di Finanza Italiane ka investuar mbi 1 milionë euro në vit në aktivitetin e inspektimit në nivel kombëtar në të gjitha sektorët institucionalë për kapjen në kohë të shenjave të infiltrimit kriminal në ekonominë vendase. Aktiviteti i Guardia di Finanzia është kryer në bashkëpunim të ngushtë me Policinë Hetimore të Tatimeve e cila është krijuar që më vitin 1921 e ka kontribuar në procedurat e parandalimit e në operacionet e pastrimit të parave të pista, në proceset e riciklimit e investimit të tyre në mallra të sigurta si në piktura arti të kuotuara në borsë, në diamante të çmuara apo gjetje arkeologjike me vlerë të veçantë.
