Ka përfunduar mbledhja e Kryesisë së Partisë Socialiste që u mblodh me urgjencë nga ana e kryeministrit Edi Rama.
Mbledhja ka nisur rreth orës 8 e 30-të të mëngjesit të sotëm, dhe përfundoi rreth orës 10:00. Edi Rama u shpreh dje i shqetësuar në mbledhjen e grupit parlamentar për shkak se sipas tij disa drejtorë po i nxijnë faqen qeverisë, duke lënë të kuptohet se puna e tyre është e pamjaftueshme, ose ca më keq janë të përfshirë në afera korruptive.
‘’Kemi ca drejtorë legena që po na nxijnë fytyrën me korrupsion e keqmenaxhim”, është shprehur dje Rama në mbledhjen e grupit, ndërsa sot nuk ka preferuar që të bëjë asnjë koment për mediat.
Në një dalje për mediat në fund të kësaj mbledhje deputetja Elisa Spiropali u shpreh se është marrë vendimi për shkarkimin e 11 drejtuesve të PS-së në rrethe.
Spiropali deklaroi po ashtu se po bëhet një analizë e punës së të gjithë drejtorave në të gjithë vendin, pasi sipas saj ka një degradim të marrëdhënieve mes pushtetit lokal dhe qytetarëve.
‘’Ka një degradim të marrëdhënieve mes pushtetit lokal dhe qytetarëve. Do të ketë një analizë të punës së drejtorave në të gjithë vendin”, është shprehur Spiropali pas mbledhjes.
Burime bëjnë me dije se janë shkarkuar 11 drejtues të degëve të PS-së në rrethe, po ende nuk janë bërë publik emrat e tyre. Mendohet se drejtuesit e PS-së janë shkarkuar në ato bashki ku drejtimin e ka PD-ja dhe LSI-ja.
Disa nga qytetet ku janë shkarkuar drejtuesit e PS:
Cërrik
Selenicë-Nertil Bellaj-njëkohësisht drejtor i AKU-së
Delvinë-Izet Silaj
Memaliaj
Këto zhvillime në selinë rozë vijnë dy ditë pas arrestimeve të bujshme të policisë ku në pranga ranë dhe dy ish-deputet socialist, Arben Ndoka dhe Arben Çuko.
