Ministrja e Shëndetësisë, Ogerta Manastirliu ka mbledhur sot Task-Forcën pasi OBSH vendosi që ta shpallë shpërthimin e koronavirusit një emergjencë shëndetësore globale.
Manastirliu siguroi se nuk ka asnjë rast të prekurve me koronavirus në vend dhe shton se Shqipëria është një ndër vendet me rrezikshmëri të ulët. Ajo u shpreh se strukturat shëndetësore do të rrisin masat në pikat hyrëse tokësore dhe detare, por dhe në aeroportin “Nënë Tereza”.
Kemi një sistem që funksionon më së miri. Kemi një laborator të mirë, me stafe të trajnuara për inteligjencën epidemike. Kemi të gjitha masat që do të ndërmarrin në raport me shkallën e rrezikshmëri. Bazuar në rekomandimet e OBSH është i nevojshëm që të gjithë strukturat të përçojnë masat mbi hetimin, gjurmimin në kohë të kontakteve dhe menaxhimin e tyre. OBSH dhe të dhënat që paraqet, ka treguar se kufizimi i njerëzve dhe mallrave mund të jetë më efektiv.
Ndaj do të rrisim dhe këshillimin e udhëtarëve që udhëtojnë drejt Kinës, si një masë parandaluese. Momentalisht ne jemi një vend me rrezik të ulët ndaj virusit, por s’do të thotë që mos të aktivizojmë shkallët e masave. Jemi në të gjitha pikat kufitare tokësore dhe detare, të cilat do të përforcohen dhe pas vendimit të fundit të OBSH. Nuk ka asnjë rast të virusit në Shqipëri, por do të përforcojmë masat për atë çka po ndodh sot në botë. Përveç Kinës, 18 vende të botës kanë raste të virusit”, tha ajo.
