Shqipëria dhe Bullgaria nënshkruajnë memorandum për të forcuar edhe më shumë zhvillimin e turizmit mes dy vendeve. Ministri në detyrë për Europën dhe Punët e Jashtme, Gent Cakaj, po zhvillon një vizitë dyditore në Sofje të Bullgarisë, ku pritet të ketë një sërë takimesh të rëndësishme.
Cakaj, gjatë ditës së sotme, ka zhvilluar një takim me Zëvendëskryeministren për Politikat Ekonomike e Demografike dhe Ministre e Turizmit të Bullgarisë, Mariyana Nikolova. Takimi u fokusua në diskutime mbi nevojën dhe hapësirat që kanë të dy vendet për të inkurajuar edhe më tej bashkëpunimin në fushën e turizmit.
Duke synuar të konsolidojnë marrëdhëniet miqësore mes dy vendeve, të kontribuojnë zhvillimin ekonomik dhe në rritjen e potencialit turistik, në fund të takimit, të dy Ministrat, nënshkruan një Memorandum Mirëkuptimi për bashkëpunim në fushën e turizmit. “Në Sofje, edhe një memorandum i nënshkruar për të forcuar edhe më shumë zhvillimin e turizmit mes dy vendeve, me Zëvendëskryeministren për Politikat Ekonomike e Demografike dhe Ministre e Turizmit, Mariyana Nikolova”, u shpreh Cakaj pas takimit. /a.a/
