Një delegacion i Drejtorisë së Përgjithshme të Pronësisë Industriale kryesuar nga drejtorja Ledina Beqiraj zhvilloi një takim me përfaqësues të Agjencisë për Pronësi Industriale të Republikës së Kosovës në kuadër të nxitjes së bashkëpunimit mes dy institucioneve. Gjatë takimit me homologun nga Kosova, Nezir Gashi, u theksua rëndësia e shkëmbimit të përvojave mes dy institucioneve çka do të sillte ndikim pozitiv në fushën e pronësisë industriale së PI-së në të dyja vendet.
Marrëveshja e bashkëpunimit parashikon realizimin e aktiviteteve të përbashkëta kryesisht në promovimin e pronësisë industriale si dhe forcimin e sistemeve kombëtare të PI. Komiteti i Monitorimit i ngritur nga përfaqësues të dy institucioneve, për zbatimin e marrëveshjes së nënshkruar në Pejë, do të ndjekë në vijimësi aktivitetet e parashikuara në këtë fushë. Pas vlerësimit të nevojave dhe hartimit të planit të veprimit, vizita e radhës do të jetë e palës homologe të Kosovës, parashikuar për t’u realizuar brenda vitit 2020.
