Kryeministri Edi Rama u bëri thirrje sot naftëtarëve të Rafinerisë së Ballshit të ndërpresin grevën e urisë, ndërsa theksoi se “jemi duke u përpjekur që ta zgjidhim atë punë”.
“Unë kam qëndruar afër atyre më shumë se askush tjetër. Ata e dinë shumë mirë dhe kam bërë detyrën morale karshi tyre duke i konsideruar njerëz familjarë me një punë. Unë e di se sa takime dhe lutje kam bërë për të sjellë investitorë, sepse nuk është pronë e shtetit. Është një rafineri e degraduar, shumë e vjetër që do një investim shumë të madh dhe këtë investim duhet ta bëjë privati”, – tha Rama.
Kryeministri theksoi se “ata janë viktima të një privatizimi skandaloz, kriminal”.
“Rafineria është pronë e bankës. Unë kam lutur investitorë për të ardhur dhe nuk kam shkuar atje me ëndrrat e mia. Kam shkuar me investitorët amerikanë atje. Ata u angazhuan, por nuk iu dilnin llogaritë dhe e lanë. Erdhi dikush tjetër, e njëjta gjë. Rafineria që të punojë ka nevojë për naftën e rëndë bruto që dilte nga fushat e Patos-Marinzës. U privatizuan fushat, hyri një investitor tjetër, dhe ai shkon direkt në treg. Nëse rafinerisë nuk i shkon gjithë sasia e naftës, rafineria fiket”, tha Rama.
Kryeministri tha se ka takuar edhe Presidentin e Azerbajxhanit enkas, meqë në një garë që u bë kishte kompani azere dhe nuk vijnë.
“Sistemi që kemi zgjedhur është për marrëdhënie kapitaliste të punës. Naftëtarët kanë marrë pagat e luftës si gjithë të tjerët gjatë periudhës së karantinës. U kemi propozuar që t’i japim një pagë sociale që ata nuk e duan. Ata kanë të drejtën e tyre të mos duan asnjë gjë, por unë nuk po neglizhoj. Çdo ditë merrem me këtë punë. Por nuk e pranoj që ata bëjnë grevë. Kur futesh në grevë futesh që të dëgjojnë. Nuk kanë ata shans në këtë vend të gjejnë dikë tjetër siç i dëgjoj unë. Unë nuk e kam një “çelës magjik” t’u jap atyre një zgjidhje. Jemi duke u përpjekur për ta zgjidhur atë punë. Dilni nga ajo grevë, nuk keni nevojë, sepse nuk është se unë do harroj. Unë e kam në fokus atë gjë. Nuk kanë nevojë të torturohen. Të shkojnë në shtëpi dhe ne jemi në punë për ta”, – tha Rama.
