Të paktën edhe për dy javë në fuqi do të mbeten masat anti-Covid që janë aplikuar deri tani. Komiteti Teknik i Ekspertëve konfirmoi këtë të enjte praninë e mutacionit britanik të koronavirusit. Nga vëzgjimi i bërë prej tyre, rezulton që në harkun kohorë të 2 javëve është vënë re një ulje e lehtë e infektimeve ditore dhe fataliteteve.
Qeveria shqiptare i ka hapur rrugën blerjes së vaksinave edhe nga Rusia dhe Kina. Përmes aktit normativ i jepet e drejta për të negociuar me shtetet që prodhojnë vaksina Ministrisë së Shëndetësisë si dhe atij të Rindërtimit. Vendimi vjen në kohën kur konfirmohen zyrtarisht rastet e para të të prekurve me mutacionin britanik të koronavirusit. Në mbledhjen e radhës të Komitetit Teknik të Ekspertëve, ministrja e Shëndetëssië deklaroi se mostrat u analizuan në laboratorin e Ankarasë.
Ky variant thonë ekspertët është më i transmetueshëm dhe më agresiv. Duke u nisur nga rastet ditore të të prekurve me koronavirus, Komiteti shikon si të arsyeshme që në fuqi të mbeten masat aktuale kundër koronavirusit. Megjithëse lanë të hapur vlerësimin e vendimit për ndalimin e grumbullimeve. Shefja e Pediatrisë në QSUT, Gjeorgjina Kuli, bëri një analizë të infektimeve mes moshave pediatrike, duke deklaruar se vetëm 5 përqind e rasteve pozitive janë shtruar në spital.
Të premten pritet të vijnë edhe dozat e para të vaksinës nga AstraZeneca, për të cilat Komiteti ynë ka vendosur ta përdorë atë te të gjitha grupmoshat, megjithëse kjo kompani sugjeron që ato të mos injektohen te personat mbi 65 vjeç. Pas largimit të Tritan Kalos nga Komiteti Teknik i Ekspertëve, ky e fundit u zgjerua edhe më 3 anëtarë të tjerë, Dr Dhimitër Kraja, Ermira Kola dhe Alban Ylli.
