Policia italiane ka vënë në pranga me akuzën e vrasjes një 24-vjeçare shqiptare banuese në komunën Ovada në provincën e Alessandrias. Shqiptarja Aurela Perhati banuese prej dy vitesh në këtë qytet akuzohet se ka aksidetuar për vdekje 53-vjeçarin italian Massimo Garitta.
Ngjarja ka ndodhur pasditen e 31 dhjetorit. Pas aksidentit 24-vjeçarja shqiptare është larguar nga vendngjarja. Falë gjurmëve të lëna në xhupin e viktimës nga marmita e automjetit tip Lancia Y e zezë në zotërim të Aurela Perhatit, policia italiane ka mundur ta identifikojë.
Gjatë mbrëmjes së djeshme e pas 6 orësh marrje në pyetje 24-vjeçarja Aurela Perhati ka rrëfyer versionin e saj të ngjarjes. Ajo ka treguar se nuk e njihte më parë Massimo Garrittan e se rreth orës 18:45 të 31 dhjetori ka pranuar ta shoqërojë me makinë.
Ky i fundit njihet nga policia italiane si person narkoman që shpesh herë kërkonte lëmoshë në rrugë për të blerë drogë.
Sipas Aurela Perhati, viktima është përpjekur ta dhunojë seksualisht duke e detyruar të zbres nga automjeti në një zonë të izoluar. Ajo ka mundur të largohet e gjatë manovrës me makinë e ka aksidentuar.
“Mendova se vetëm e kam prekur me makinë e jo aksidentuar deri në vdekje”, ka deklaruar ajo.
Për mediat lokale italiane avokati i saj mbrojtës është shprehur se “nuk ka qenë vrasje e qëllimshme dhe e paramenduar. Ka qenë një rast tragjik e i pafat”.
Për policinë italiane mbetet ende pikëpyetje disa momente të kësaj ngjarje e në veçanti motivi i këtij aksidenti.
Prokurori i çështjes Enrico Cieri ka deklaruar se “motivi i dhunës seksuale është për t’u marrë në konsideratë, por ende për t’u verifikuar. Viktima është gjetur me pantallona të ulura por njëkohësisht dhe 24 vjeçarja ka pranuar qëllimin e saj për të përplasur me makinë. Për identifikimin e autorit kanë ndihmuar mjaft dhe dëshmia e dy personave si dhe videokamerat e sigurisë rrugore”.
Aurela Perhati ndodhet aktualisht në burgun e Vercellit. Ajo jetonte në Ovada së bashku me familjen e saj, aktualisht ishte e papunë por deri para disa muajsh kishte punuar si shitëse në një dyqan këpucësh.
