Presidenti i vendit Ilir Meta firmosi ditën e sotme dekretin për shkarkimin e 6 ministrave të përmendur nga kryeministri Edi Rama në fundin e vitit që lamë pas.
Përsa i përket ministrit të Jashtëm, Ditmir Bushati, Meta nuk e hodhi firmën dhe do të ushtrojë të drejtën kushtetuese, e cila i jep shtatë ditë kohë për të vendosur.
Të njëjtën gjë presidenti bëri edhe për kandidaturat e reja të propozuara nga Rama.
Meta hodhi firmën në letër vetëm për Erion Braçen si zv.kryeministër, Elisa Spiropalin si ministre për Marrëdhëniet me Parlamentin, Bledi Çuçin si ministër Bujqësie dhe Eduard Shalsin si ministër për Sipërmarrjen.
Furtuna në kabinetin qeveritar të Ramës është komentuar edhe nga Zëri i Amerikës.Ata janë ndalur kryesisht tek Gent Cakaj, propozimi i Ramës për postin e ministrit të Jashtëm.
Sipas Zërit të Amerikës, kjo kandidaturë është parë me skepticizëm nga Meta, për shkak të moshës së re dhe mungesës së eksperiencës, nisur nga fakti se Shqipërinë e presin sfida të rëndësishme, që nga marrëveshjet me Greqinë e deri tek hapja e negociatave me BE-në.
Ndërkohë përsa i përket kandidaturave jashtë politikës, në artikull thuhet se mesazhi i Metës, ishte i qartë. Presidenti do të shfrytëzojë kohën prej 7 ditësh, për të bërë verifikimet e nevojshme.
