Aktori shqiptar i humorit, Visjan Ukcenaj ka folur këtë të shtunë për arritjet në profesionin e tij, si dhe ka ndarë me publikun disa detaje nga jeta private. Teksa ishte i ftuar në “Një ditë me Dojnën”, Ukcenaj theksoi se pasuria e tij më e madhe që ka vënë në jetë është familja. Sa i takon të ardhurave që merr nga profesioni, aktori shtoi se nuk është fitimprurës.
“Me thënë të drejtën jam shumë i pasur, jam ndër njerëzit më të pasur që njoh sepse kam një djalë të shëndosh si drita, kam partneren dhe jam shumë i lumtur me familjen time. Bëj një jetë shumë normale, pasuria ime e vetme është familja, s’kam asnjë pasuri tjetër. Praktikisht nga ana monetare mund të them edhe që jam i varfër”, tha Visjani.
Më pas, aktori nuk është treguar i rezervuar për të komentuar jetën e “Instagram-it”, ku të rinjtë përpiqen t’i bëjnë reklamë vetes dhe të fitojnë para lehtësisht, pa punuar asnjë ditë: “Si ka mundësi more plak unë kam gjithë jetën që punoj, jam lodhur kam bërë 2-3 punë dhe s’kam mundësi të blej një shtëpi, një makinë luksoze, si ka mundësi dikush që s’ka bërë asgjë në jetë ka nxjerrë b*thën në Instagram ka makina ka çdo gjë. Kjo me irriton sepse shikon në fund të muajit je aty ku ishe, je gropë prapë”.
