Qeveria spanjolle prezantoi sot një projektligj për tranzicionin e energjisë, që synon të arrijë neutralitetin e karbonit deri në vitin 2050, i kritikuar tashmë nga OJQ-të për mungesën e ambicies së objektivave të tij. “Tranzicioni i energjisë dhe lufta kundër ngrohjes globale duhet të jenë shtyllat në të cilat të bazohet rindërtimi social dhe ekonomik pas krizës së shkaktuar nga pandemia e koronavirusit të ri”, tha zëdhënësja e qeverisë, Maria Jesus Montero, pas përfundimit të takimit të Këshillit të Ministrave.
Përveç neutralitetit të karbonit në vitin 2050, që supozon se emetimet e gazrave serë të jenë kompensuar nga mekanizmat e thithjes, projektligji synon t’i sigurojë Spanjës një rrjet energji 100% të rinovueshme në të njëjtën datë. Qeveria kërkon që të gjitha automjetet e reja të kenë zero emetim deri në vitin 2040 dhe pretendon të detyrojë instalimin e stacioneve të karikimit elektrik në stacionet më të mëdha të shërbimeve.
