Përfundon në gjysmëfinale përralla e Villarrealit në këtë edicion të Champions League. Skuadra e Emery zhvillon një pjesë të parë spektakolare dhe bën me zemër Liverpulin, pasi arrin të shënojë dy herë në portën e anglezëve, duke baraspeshuar deri në atë moment rezultatin e përgjithshëm të takimeve në 2-2, pasi kishte humbur takimin e parë në “Anfield” 2-0.
Por, skuadra e Jurgen Klop zgjohet në pjesën e dytë dhe përmbys gjithçka, duke fituar 3-2 në “Estadio de la Ceramica” dhe me rezultatin e përgjithshëm 5-2.
Liverpuli siguron një vend në finalen e madhe të Champions League, ndërsa Villarreali largohet me kokën lart nga ky turne. Pasi eliminoi më parë Juventusin dhe Bayernit, për 45 minuta spanjollët iu afruan mrekullisë, por më pas u dorëzuan përballë forcës dhe klasit të skuadrës së Klopp.
Villarreali zhvillon një pjesë të parë perfekte dhe arrin të rikuperojë disavantazhin e dy golave të pësuar në ndeshjen e parë në “Anfield” kundër Liverpulit. Skuadra e Emery nis vrullshëm lojën dhe kalon që në minutën e 3-të në avantazh me Dia, që shfrytëzon si duhet një asist të Capoue.
Anglezët mundohen të reagojnë, por nuk shfaqen asnjëherë rrezikshëm në portën e vendasve. Villarreali pretendon një penallti për një faull në zonë të Alisson në dëm të Lo Celso por për gjyqtarin nuk ka 11-metërsh. Pak minuta para se të përfundojë pjesa e parë spanjollët shënojnë edhe golin e dytë, kësaj radhe me Coquelin, që dërgon me kokë në rrjetë një top të dhënë nga Capoue.
Klopp hedh në fushë Luis Diaz dhe sulmi i anglezëve funksionon më mirë në pjesën e dytë. Liverpuli ka një tjetër qasje dhe i afrohet golit me Alexander Arnold, por topi ndalet në traversë. Miqtë dominojnë dhe gjejnë rrugën e rrjetës me Fabinho (62′). Pak minuta më vonë Luis Diaz (67′) barazon shifrat dhe tashmë është mbyllur çështja kualifikim.
Villarreali është shuar dhe tashmë Liverpool është zot i fushës. Mane (74′) përfiton nga një gabim i portierit Rulli dhe përmbys gjithçka, duke shënuar edhe golin e tretë për “të kuqtë”. Duket se goli i ka prerë spanjollët, që nuk arrijnë dot të futen më në lojë.
Mbyllet 3-2 për Liverpulin, një sfidë me dy tablo. Vendasit dominojnë pjesën e parë, por miqtë zgjohen në të dytën dhe me meritë shkojnë në finalen e madhe të këtij sezoni të Champions League.
