Studentët të Fakultetit të Shkencave të Natyrës kanë zhvilluar një marshim proteste në mbrojtje të Kopshtit Botanik, që pritet ti kalohet në administrim bashkisë së Tiranës. Për këtë FSHN ka paditur edhe Këshillin e Ministrave.
“Ne këtu po shikojmë një Tiranë tjetër, ne po marshojmë në rrugë sepse s’ka trotuare. Këtu ekziston një problem i madh me qeverinë, aq më tepër që kopshti botanik është ngritur nga katedra e biologjisë, nuk mund ja lëmë këtë pasuri një bashkie që nuk është e besueshme”, tha një prej studentëve.
Studenti tha se janë dakord që bashkia të investojë në këtë kopsht, por kurrsesi që ti kalojë në pronësi.
“Ne jemi të hapur që bashkia të investojë në kopsht, por nuk mund të kthehet në një pjesë rekreative siç thotë bashkia. Ne kërkojmë që kopshti të administrohet nga FSHN dhe të arrihet marrëveshja për të investuar nga bashkia, por jo të merret administrimi”, tha studenti për Ora News.
Për të gjithë këtë situatë FSHN fajëson ministrinë e Arsimit, e cila i ka propozuar qeverisë që kjo pronë ti kalojë bashkisë pa u konsultuar.
