Drejtori sportiv i Lacios, Igli Tare është një nga njerëzit më të rëndësishëm në klub dhe padyshim një pjesë e madhe e meritës për ecurinë e kryeqytetasve në këtë sezon i takon edhe atij. Pas triumfit në Superkupë ndaj Juventusit, Tare mendon se skuadra mund të përmirësohet edhe më shumë por ka nevojë për mbështetjen nga publiku dhe të luaj në një stadium plot si ndodh në Angli apo Gjermani.
“Për të arritur aty ku duam duhet të bëjmë të gjithë një hap para. Nuk flas vetëm për skuadrën, por edhe ambientin sepse djemtë kanë nevojën për mbështetjen e publikut. Jemi akoma larg nga ajo çfarë meriton ky grup. Është një rrugëtim i gjatë, ne duhet të kërkojmë gjithmonë të bëjmë më të mirën dhe të nderojmë fanellën.
Dhe pak nga pak, njerëzit do e kuptojnë dhe do kthehen të jenë prezentë. Mua më pëlqen shumë modeli i Anglisë dhe Gjermanisë, pavarësisht orarit që luhet stadiumi është gjithnjë plot. Edhe kundër skuadrave të kategorisë së tretë. Duhet të përmirësohemi sepse ka shumë mundësi, do të kemi shumë beteja për të përballuar”, u shpreh Tare.
