Shtetas të huaj nga vende të ndryshme të botës kanë zgjedhur Vlorën si destinacion për të punuar e për të jetuar. Ata paraqiten në zyrën e emigracionit në Vlorë për t’u pajisur me leje qëndrimi, për rinovim dokumentesh apo për shtyrje të kontratave të punës. Mes tyre ka shtetas nga Ukraina, Rusia, Italia e deri nga Uganda e largët, të cilët kanë zgjedhur për të punuar në qytetin bregdetar.
“Jam nga Uganda, nga Afrika. Kemi disa muaj këtu në Vlorë, punojmë në sektorin e turizmit. Familjen e kemi në Ugandë. E mendoj të ardhmen këtu pasi Vlora dhe Shqipëria është një vend shumë i bukur. Ndoshta dhe familjen do ta sjellim shumë shpejt”, tha një i huaj. Shumë prej tyre e shohin Vlorën si një destinacion ideal për të ndërtuar të ardhmen e tyre.
“Unë jam nga Rusia. Punoj përmes internetit online. Jam vendosur prej pak kohesh këtu. Dhe te ardhmen e shikoj ndoshta këtu”, tha një tjetër. Sipas burimeve zyrtare nga zyra e emigracionit, shtetasit italianë përbëjnë grupin më të madh të të huajve që pajisen me leje qëndrimi në Vlorë. Shumica e tyre janë pensionistë që kanë zgjedhur Shqipërinë si një vend ideal për të jetuar në qetësi. Ndërkohë, kombësitë e tjera janë kryesisht të angazhuar në sektorin e turizmit, një treg i cili vazhdon të tërheqë gjithnjë e më shumë punonjës të huaj.
