Një turist kinezë ka përfunduar në pranga, pas përpjekjes për të nxjerrë jashtë Sri Lankës 200 akrepa. Sipas autoriteteve vendase, policia sekuestroi 200 akrepa, të cilat kinezi u përpoq t’i kalonte nëpërmjet aeroportit të vendit Colombo Airport.

30 vjeçari kishte në plan të udhëtonte për Guangzhou, kur akrepat në valixhen e tij janë detektuar nga skaneri i aeroportit, raporton CNN, përcjell Tirana Today.

Foto të bëra publike nga autoritetet tregojnë akrepat të paketuar nëpër kuti plastike.

“Janë mbledhur nga zona të ndryshme të vendit, nuk janë vdekjeprurëse, por janë të mbrojtura”, tha një prej zyrtarëve të aeroportit.

Për këtë ndalim, kinezi është detyruar të paguajë një gjobë prej 552 dollarësh amerikanë si dhe do të përballet me hetimin e autoritete vendase.

Në Kinë, akrepat përdoren si mjekësi alternative. Helmi i tyre kombinohet me ingredientë të tjerë dhe përdoret për lirimin e muskujve dhe nervave.