Grupet e inspektimit kanë zbritur në terren për të kontrolluar dëmet e shkakatuara nga lëkundjet e tërmetit. Kreu i Institutit të Ndërtimit bëri me dije se nga inspektimet e kryera deri më tani mbi 90 % e objekteve kanë rezultuar pa probleme, edhe pse njerëzit shqetësohen për një plasaritje të suvasë. Për të përballuar situatën, Ministrja e Financave bëri me dije se do të shtohet fondi i emergjencës për dëmet nga tërmeti.
Pas qetësimit të tokës dhe të motit, inxhinierët kanë zbritur në terren për të vlerësuar dëmtimin e banesave private dhe institucioneve shtetërore.
Grupi i inspektimit pasi kontrollit nga afër të ambienteve të Fakultetit Ekonomik deklaroi se kushtet e ndërtesës nuk janë të rrezikshme dhe mësimi mund të nisë pa asnjë problem.
Kreu i Institutit të Ndërtimit u shpreh se nga inspektimet e bëra së fundmi në Tiranë, Elbasan dhe Vorë ka rezultuar se 90% e objekteve nuk kanë probleme në strukturë dhe nuk përbëjnë rrezik për qytetarët.
Agron Hysenlliu: 99% e gopdinave nuk kanë problematikë në strukturë, por në rifiniturë. Kjo do të thotë që struktura është e garantuar.
Shqetësim mbetet fakti se ankesat janë bërë dhe për dëmtime të lehta.
Agron Hysenlliu: Për një vijëzim që mund të ketë një mur të mos i ndërtohen Institutit të Ndërtimit. Në Vorë në momentet e para kishim rreth 100 shtëpi. Numri i shtëpive që na është kërkuar për ti parë ka shkuar në 800.
Në lidhje me dëmshpërblimin e dëmeve, Ministrja e Financave gjatë një inspektimi në disa biznese në Durrës premtoi se do të shtojnë fondet për rimbursim të dëmeve.
Anila Denaj: Ne nga buxheti i shtetit disponojmë fondet për ta mbështetur pjesën e konstatimit të dëmeve me rimbursim.
Ministrja garantoi se dëmet e shkaktuara nga tërmeti do të përballohen nga buxheti i shtetit, i cili disponon fondet e nevojshme.
