Tërmeti i fuqishëm që goditi të premten Detin Egje midis bregdetit turk dhe ishullit grek të Samos, ka vrarë të paktën 19 njerëz dhe duke plagosur 709 të tjerë, si dhe shembi shumë ndërtesa, thanë zyrtarët. Në Turqi u raportua për 17 të vdekur, ndërsa dy njerëz vdiqën në ishullin grek të Samos.Operacionet e kërkimit dhe shpëtimit në 17 ndërtesa të shembura, ose të dëmtuara janë duke vazhduar në Izmir. Ekipet e shpëtimit përpiqen të gjejnë të mbijetuarit ndërsa errësira bie mbi rrënoja.
Ora 18:01– Autoritetet turke kanë raportuar se që nga tërmeti i mesditës deri më tani, janë shënuar 97 paslëkundje, 20 prej të cilave ishin të magnitudës mbi 4 të shkallës rihter. Qendra e Koordinimit të Fatkeqësive Shëndetësore turke ka bërë me dije se janë shënuar 12 viktima, 1 prej të cilëve është mbytur. Ndërkohë që 419 persona janë plagosur si pasojë e shembjes së godinave. Kërkimet vijojnë në 17 godina të dëmtuara në Izmir.
Ora 16:40– Numri i viktimave në Izmir të Turqisë ka shkuar në 6 si pasojë e tërmetit të mesditës së sotme.
Sipas mediave turke, së fundmi kanë humbur jetën edhe dy fëmijë, teksa numërohen 202 të plagosur.
Sakaq vijojnë kërkimet nën rrënojat e ndërtesave të shembura nga lëkundjet. Tërmeti i magnitudës 6.6 të shkallës rihter goditi mesditën e sotme brigjet e detit Egje, ku më të prekurit ishin ishulli grek i Samosit dhe qyteti i Izmirit në Turqi. Tërmeti u shoqërua edhe me shumë paslëkundje, duhe hapur panik te qytetarët. Dhjetra godina janë shembur, në një kohë që raportohet për shumë të bllokuar nën rrënoja.
