Promovimi i “pozitivitetit fizik” duket të jetë një industri më vete tashmë në Instagram. Me qindra-mijëra atlete, sportistë por edhe njerëz të thjeshtë janë shndërruar në busullën e miliona fansave, të cilët i ndjekin për të parë, ndoshta edhe mësuar nga rutina e tyre e shëndetshme ushqimore por edhe e ushtrimeve fizike. Një prej tyre është edhe modelja Sophie Gray, e cila më parë ndante me fansat fotografi në bikini nga palestra, derisa një ditë vendosi të mos e bëjë më. Ajo megjithatë tha në një intervistë për “Daily Mail” se do të vazhdojë të influencojë njekjësit e saj që të bëjnë një jetë më të shëndetshme, por këtë do e bëjë duke mos ekspozuar më linjat trupore.
Menjëherë pas kësaj deklarate publike në Instagram, numri i ndjekësve të saj ra nga 430,000 në 360,000. “Gjithçka që bëja rrotullohej rreth atyre fotove. Unë vazhdimisht shqetësohesha për imazhin e trupit tim, sepse “vlera” ime përmes këtij kanali varej nga kjo gjë. Unë kam 3 vite me këtë profil. E pashë se cilat fotografi performojnë më mirë. E pashë që njerëzit kërkonin të shikonin trupin perfekt,” u shpreh ajo. Megjithëse në këtë periudhë ajo pranon se kaloi një fazë të vështirë emocionale, tashmë thote se ndihet shumë më mirë.
