Pas aksidentit të rëndë ku autobusi i linjës së “Unazës” përfundoi në lumin Lanë, në kryeqytet nisi një ‘sagë aksidentesh’ me transportin publik.
Dy aksidente të tjera u regjistruan, fatmirësish pa viktima apo të lënduar, ndërsa një shofer u arrestua pasi po drejtonte urbanin nën efektin e alkoolit.
Policia ka njoftuar se për të shmangur ngjarjet e tilla ka nisur një aksion kontrollesh blic për evidentimin e ndëshkimin e drejtuesve të mjeteve që kryejnë shkelje agresive. Sipas bluve të kryeqytetit, ditën e djeshme 15 shoferë të autobusëve i janë nënshtruar kontrollit të alkoolit.
Njoftimi i policisë: Aksion blic dhe kontrolle të befasishme në mjetet e transportit publik, për evidentimin e ndëshkimin e drejtuesve të mjeteve që kryejnë shkelje agresive.
Në këtë kuadër, gjatë 24 orëve të fundit, rëndësi e veçantë i është kushtuar kontrolleve të befasishme të drejtuesve të mjeteve të transportit publik, në linja të ndryshme të autobusëve, në kryeqytet.
Ditën e djeshme i janë nënshtruar testit të alkoolit, 15 drejtues të mjeteve të transportit publik, me qëllim parandalimin e aksidenteve rrugore dhe për t’iu siguruar qytetarëve, një transport sa më të sigurt.
Policia Rrugore e Tiranës apelon për zbatim me rigorozitet të rregullave të qarkullimit rrugor dhe fton qytetarët që udhëtojnë me mjete të transportit publik apo çdo mjet tjetër, që të denoncojnë në Komisariatin Dixhital dhe në numrin pa pagesë 112, çdo rast të shkeljes së rregullave të qarkullimit rrugor.
