Policia Gjyqësore Federale në Bruksel ka arrestuar një grup trafikantësh shqiptarë prej 12 personash, nga të cilët 7 në Bruksel dhe 5 të tjerët në vende të ndryshme të Europës.
Shqiptarët që ndodhen të arrestuar në vendet e tjera të Europës do të dërgohen në Belgjikë në mënyrë që ata të paraqiten para gjykatës, shkruan HNL.
”Pas një hetimi të plotë nga Policia Gjyqësore Federale (FGP) e Brukselit, u arrestua një grup kriminelësh shqiptarë. Ata ishin të përfshirë në trafikim e njerëzve për në Mbretërinë e Bashkuar. Pas një ndërhyrje të parë në territorin belg, disa të dyshuar të tjerë u arrestuan jashtë vendit”, tha prokurori federal.
Në korrik të vitit 2018, FGP i Brukselit ndoqi nga afër aktivitetet e shqiptarëve të ndryshëm, të cilët dyshohen për trafikimin e paligjshëm të shtetasve shqiptarë nga Brukseli në Mbretërinë e Bashkuar. Duke pasur parasysh shtrirjen e tregtisë dhe rreziqet e pretenduara në vendet e tjera të Evropës, përfshirë Francën dhe Mbretërinë e Bashkuar, çështja penale u mor më pas nga Zyra Federale e Prokurorisë.
Më 19 dhjetor 2019, hetuesit belgë, të ndihmuar nga kolegët e tyre nga Antwerp, Halle-Vilvoorde dhe Mons, ndërhynë njëkohësisht në shtatë adresa të ndryshme. Gjatë këtij operacioni u arrestuan shtatë të dyshuar, me kombësi shqiptare. Dy persona u arrestuan me akuzën e trafikut të drogës. Gjatë operacionit, hetuesit zbuluan kokainë, një peshore dhe një makinë llogaritëse.
Në bashkëpunim me policinë britanike, kreu i organizatës u arrestua në të njëjtën kohë në Mbretërinë e Madhe. Pesë anëtarë të tjerë të organizatës, dy të dyshuar në Mbretërinë e Madhe, një i dyshuar në Greqi, një i dyshuar në Itali dhe një i dyshuar në Mal të Zi u arrestuan gjithashtu jashtë vendit.
