Një 34-vjeçar ka rënë në prangat e policisë greke, i akuzuar për posedim dhe shpërndarje të lëndëve narkotike në zonën e Atikës.
Arrestimi u bë mbrëmjen e së hënës, më 6 prill, në një zonë të Pireut, pas një operacioni të mirëorganizuar nga njësitë speciale të policisë, të njohura si “FBI grek”.
Sipas burimeve zyrtare, i riu u kap brenda një taksie, ku gjatë kontrollit iu gjetën më shumë se 3.2 kilogramë heroinë, si dhe rreth 500 gramë substancë që përdorej për përzierjen e saj, me qëllim hedhjen në treg.
Operacioni vijoi me kontrollin e banesës së tij, ku policia zbuloi edhe mbi 5.5 kilogramë heroinë të tjera, një presë hidraulike, peshore precize dhe pajisje të posaçme për përpunimin e drogës.
Në total, autoritetet sekuestruan 8,860 gramë heroinë, 420 gramë substancë me përbërje të panjohur, një presë hidraulike me kallëp metalik, dy peshore precize, një automjet, një taksi, 725 euro dhe dy telefona celularë. 34-vjeçari është shoqëruar në Prokurori, ku pritet të përballet me akuzat përkatëse.
