Detyra si prokuror, mesa duket është pista kryesore e hetimit për makinën e shpërthyer me eksploziv të prokurorit të Vlorës Albert Kuliçi. Kjo pistë është konfirmuar nga kreu i Gjykatës së Vlorës Skënder Haluci, i cili ka dhënë edhe një prononcim të shkurtër për mediat. Sipas tij, “Nuk ka asnjë lidhje tjetër veç me ushtrimin e funksionit të prokurorit. Kjo është një ngjarje e shëmtuar prej frikacakësh dhe burracakësh”.
Për më tepër, kryetari i gjykatës ka theksuar se ai vetë ka kohë që ka kërkuar masa shtesë për sigurinë e jetës për prokurorët dhe gjyqtarët në Vlorë. “Në vazhdimësi e kam ngritur si shqetësim marrjen e masave për sigurimin e jetës, mbi të gjitha në gjykatën dhe prokurorinë e Vlorës. Jam në mbështetje të prokurorit dhe familjareve të tij për te vijuar dhe ushtruar detyrën e prokurorit si një nga prokurorët më të mirë të vendit”, nënvizoi Haluci.
