Në ditën e tretë të takimit të tij me të rinjtë, në kuadër të turit “Rrugëtimi për Shqipërinë”, pas Elbasanit dhe Korçës kreu i PD-së është ndalur sot në Shkodër.Në një bashkëbisedim me të rinjtë atje, gjatë fjalës së tij Lulzim Basha u shpreh se Shqipëria i ka të gjitha mundësitë dhe potencialin e duhur për të mbajtur të rinjtë këtu, në mënyrë që ata të mos largohen.Basha u zotua se me ardhjen në pushtet të Partisë Demokratike, më shumë vende pune do të hapen për të rinjtë e Shkodrës.
“Ekonomia aktuale nuk ofron mundësi për të rinjtë. Është një ekonomi që krijon klimë mbytëse për bizneset, sidomos për bizneset e vogla. Kjo ka një përgjegjës, qeverinë me në krye Edi Ramën. Largimi i rinisë saç është përgjegjësi e kësaj qeverie, është edhe kosto për vendin. Të rinjtë po ikin, klasat e shkollat po mbyllen. Ka ardhur koha që të gjithë bashkë të bashkohemi, që halleve dhe brengave t’u japim zgjidhje, e së bashku t’i bëjmë realitet. Rrugëtimin tonë do ta çojmë deri në fund. Shqipërinë do ta çlirojmë nga kjo qeveri. Shkodrën do ta çlirojmë dhe do krijojmë vende pune për të rinjtë, me paga dinjitoze. Ky është zotimi im kryesor, të kthejmë shpresën dhe besimin. Do krijojmë mirëqënien e duhur që shqiptarët të mos largohen, pasi Shqipëria e ka potencialin t’i japë mundësinë çdo të riu të punësohet me paga dinjitoze. Kjo është tema kryesore që dua të diskutoj sot me ju”, tha Basha në fjalën e tij hapëse.
