Ministri i Brendshëm, Sandër Lleshaj, reagoi sot për një video të publikuar në medie ku thuhej se punonjësit e policisë po vidhnin disa pako me ndihma.
Lleshaj theksoi se ato qese po dërgoheshin në depon e provave materiale të SHÇBA, struktura që po kryen hetimin në zbatim të detyrave të prokurorit përgjegjës.
“Edhe korbat kemi mangët. Teksa jam në Kurbin, në punë për menaxhimin e gjendjes së rëndë, më njoftojnë se disa pisa pa nder dhe dinjitet kanë publikuar një mashtrim të ulët. Patjetër që duhet të jenë me shumë përvojë në poshtërsira, përderisa imagjinata perverse e tyre prodhon turpe të tilla. O të mjerë! Ato qese, që kanë ngazëllyer maninë tuaj perverse, janë prova materiale, që i janë kapur një hajduti si puna juaj dhe nuk po shkojnë në zyrën e Ministrit të Brendshëm, por në depon e provave materiale të SHÇBA, struktura që po kryen hetimin në zbatim të detyrave të prokurorit përgjegjës”, – theksoi Lleshaj.
Ministri Lleshaj tha se “për këtë turp, tani keni dy rrugë: ose të provoni lajmin e rremë, ose të jepni llogari deri në një para ligjit, si mashtrues ordinerë, që shfrytëzoni gjendjen e rëndë për të bërë biznesin e ndyrë me lajme të rreme. Zgjidhni”./k.s/ /a.g/ATSH
