Detaje të reja nga krimi i rëndë që tronditi mbrëmjen e sotme zonën e Selenicës, ku 36-vjeçari Dalan Alliaj u vra me gjashtë plumba nga kushëriri i tij, Bertil Alliaj.
Ngjarja ka ndodhur rreth orës 20:25, në fshatin Gjorm, teksa viktima po hynte në derën e shtëpisë së xhaxhait, ku kishte shkuar për vizitë. Dalan Alliaj ishte me origjinë nga Levani i Fierit, ku jetonte dhe drejtonte një biznes pjesë këmbimi për automjete.
Sipas burimeve nga policia, autori i dyshuar Bertil Alliaj, djali i xhaxhait të viktimës, është arratisur në zonën malore përreth pas krimit. Ai është në kërkim nga forcat e rendit dhe FNSH, që po krehin territorin për kapjen e tij.
Bertil Alliaj është një emër i njohur për drejtësinë, pasi është përfshirë më herët në masakrën e Çoles të vitit 2015, ku mbetën të vrarë tre persona: Akil Hasanaj, Ardi Velaj dhe Albi Limaj. Ende nuk dihen motivimet e kësaj ngjarjeje të fundit që i mori jetën kushëririt të tij.
Në vendngjarje kanë mbërritur policia, FNSH dhe ekspertët e kriminalistikës, të cilët kanë bërë këqyrjen e plotë të zonës. Deri tani janë shoqëruar pesë persona, mes tyre: djali tjetër i xhaxhait të viktimës, që ndodhej me të në momentin e vrasjes, kryeplaku i fshatit, si dhe tre banorë të tjerë që mund të kenë dijeni për ngjarjen.
Nga këqyrja paraprake e trupit të viktimës janë konstatuar gjashtë plagë nga plumbat, të cilat i kanë shkaktuar vdekjen e menjëhershme. Trupi i 36-vjeçarit është transportuar në morgun e spitalit të Vlorës, ku kanë mbërritur edhe familjarë të shumtë të tij.
Nën drejtimin e Prokurorisë së Vlorës, vijojnë hetimet për zbardhjen e plotë të rrethanave të këtij krimi të rëndë që ka tronditur Selenicën.
