Fax News ka zbuluar detaje të reja për pesë të riatdhesuarit nga kampi Al Hol në Siri që erdhën ditën e djeshme në Shqipëri. Burime jo zyrtare bëjnë me dije se janë dërguar në Kampin e Kavalishencës në Durrës.
Familjarët nuk kanë dijeni se sa do të zgjasë qëndrimi i tyre nën kujdesin e autoriteteve shtetërore dhe nuk kanë asnjë kontakt me personat e riatdhesuar.
Ditën e djeshme, kryeministri Rama u shpreh se fëmijët që do të riatdhesohen nga qeveria prej kampit Al-Hol, do të ndiqen nga një ekip i specializuar në një qendër të posaçme. Rama tha se për trajtimin e këtyre fëmijëve do të kërkohet edhe ndihma e familjarëve dhe të afërmve që jetojnë në Shqipëri.
“Ne e kemi gati strukturën e ngritur për këta fëmijë, ku do të ndiqen dhe do të trajtohen, qoftë nga psikologë, qoftë nga mjekë. Ne padyshim që do të kërkojmë dhe ndihmën e familjarëve të tyre që ata të riintegrohen sa më parë”, u shpreh Rama, ndërsa mësohet se katër fëmijët e kthyer sot do ti dorëzohen fillimisht shërbimit social.
Sa i takon përgjegjësisë ligjore me të cilën do të përballen njerëzit që janë në moshë madhore, Rama tha se drejtësia duhet të bëjë punën e saj.
“Nuk diskutohet që kush ka bërë krime do ti nënshtrohet drejtësisë, po këto nuk janë çështje të miat. Rastet do të trajtohen në mënyrë individuale, aq që diskutohet se këtu kemi dy kategori të ndryshme nga njëra tjetra, edhe brenda vetë të rriturve, dhe përgjegjësia do të jetë e secilit prej tyre“, tha Rama. (A.M/Faxweb.al)
